На интернет се појавија фотографии кои го откриваат изгледот на Ferrari Purosangue.
Purosangue се смета за првиот теренец на Ferrari, но гигантот од Маранело не сака да го нарекува така. Како и да е, фотографиите „протекоа“ од фабриката и сега дефинитивно знаеме што да очекуваме кога Purosangue официјално ќе биде претставен. Фотографиите се далеку од идеални, но сепак откриваат како изгледа претстојниот модел однапред и одзади, додека страничниот профил исто така е делумно видлив.
И на прв поглед е јасно дека Purosangue не личи на конвенционален SUV, најмногу поради неговата висина и веројатно тоа е една од причините зошто Ferrari не сака таква класификација.
Purosangue повеќе личи на малку подигнат хечбек, а од Маранело истакнуваат дека тоа е нивното FUV, односно Ferrari Utility Vehicle.
Предниот дел на автомобилот потсетува на моделот Roma, особено кога се во прашање фаровите, а тоа дефинитивно не е негативна работа бидејќи Roma е можеби најубавото Ferrari по моделот 458.
Примерокот на фотографиите има лакови на тркалата во различна боја во споредба со каросеријата, што прави Purosangue да изгледа поробустен од моделот што го заменува, а тоа е GTC4Lusso.
Purosangue најверојатно ќе биде придвижуван од 3,9-литарски твин-турбо V8 мотор кој се користи и за други модели на Ferrari како Roma и F8 Tributo. Гласините велат дека Purosangue би можел да добие и V12 мотор кој развива речиси 800 КС, но оваа информација е непотврдена.
