Тренерот на Конор Мекгрегор призна дека се оддалечиле со ирскиот ММА борец по неговиот драматичен пораз од Хабиб Нурмагомедов.
Мекгрегор ќе се врати во УФЦ октагонот за првпат по 15 месеци и ќе се соочи со ветеранот Доналд Сероне во Лас Вегас на 19 јануари.
Ирецот се дистанцираше од светот на УФЦ по поразот и се фокусираше на неговиот бизнис како производител на виски.
Неговиот тренер Џон Кавано сега тврди дека се блиски како никогаш досега.
„Малку се оддалечивме, нему му се случуваа многу работи во животот, бизнисот со виски и други работи, а мојот тим беше зафатен со многу нови борачи кои се приклучија“, рече Кавано.
„Тоа е природен тек на нештата, но изминативе месеци беа фантастични. Поблиски сме од кога било и имам добро претчувство за борбата“, рече тренерот.
„Редовно доаѓа на тренинзи. Не бев сигурен дали ќе може да ги издржи тренинзите кои му ги подготвував, да бидеме реални, човекот заработува многу пари и тешко да одиш да трчаш откако ќе се разбудиш во свилени гаќи“, се пошегува Кавано.
„Но, доаѓа и тренира и се мотивира. Покажува дека сака повторно да се натпреварува на највисоко ниво.“
Кавано исто така инсистира дека Мекгрегор ќе се врати во октагонот како подобар борач од оној кој попушти под ударите на Нурмагомедов.
„Дефинитивно ги има подобрено вештините. Технички гледано, тој е најдобриот борач што сум го видел“, додаде тренерот.
