Шпанските медиуми се сè посигурни дека Лука Модриќ и следната сезона ќе продолжи да настапува за Реал Мадрид.
Капитенот на хрватската репрезентација во септември ќе го прослави својот 39 роденден, а иако во најголем дел од актуелната сезона сè уште се зборуваше и пишуваше дека тоа е една од причините поради кои клубот е подготвен да се збогува со својата икона, се чини дека дојде до промена во размислувањето на челниците на клубот.
„Политиката за продолжување на договорите за една сезона за играчи кои имаат над 30 години има граница. Лука Модриќ ја премина. Хрватот е блиску до 40 години и завршува уште една сезона без алармантни знаци на пад што би го принудиле да се откаже играјќи за Мадрид“, пишува El Confidencial, анализирајќи ја ситуацијата на Модриќ во клубот.
„Тој смисли формула според која е профитабилен за клубот во спортска, финансиска и човечка смисла. Тој сака да остане во клубот бидејќи верува дека е корисен во минутите што ги поминува на теренот, прифати улога на играч од клупата и не се троши психички или физички. Реал сака да продолжи со него затоа што Хрватот е финансиски профитабилен, затоа што има смисла спортски и затоа што не е склон на повреди. Исто така, тој е учител од кој учат помладите играчи“, се додава.
Потоа дополнително се објаснува зошто е можно продолжување на договорот помеѓу Реал и Модриќ.
„Она што Модриќ го предлага е намалување на платата и подготвеност да му помогне на тренерот да го води тимот на теренот. Она што го добива е надежта дека ќе продолжи да игра за Реал, што е негов приоритет на спортски и семеен план.“
Во таа равенка, Реал добива лидер и тимски играч со значително помали примања во однос на минатото. El Confidencial наведува дека во овој договор во кој „Хрватот е конкурентен, амбициозен и чесен“, Модриќ не го губи достоинството.
„Модриќ е уникатен случај. Тој заслужува време за игра и почит поради неговите квалитети, борбеност и пријателство. Не затоа што има намера да живее од она што го направил, а не затоа што моли за уште една година од договорот. Ова беше јасно нагласено во разговорите со челниците на клубот. Тој ќе продолжи доколку се ценат неговите заслуги и доколку клубот има корист од тоа“, продолжува во текстот и се нагласува дека тој направил чекор кон тоа со тоа што предложил да му се намали платата за да не се оптоварува буџетот на клубот.
„Чекорот што го направи го крши калапот на фудбалскиот бизнис. Тој му кажува на клубот дека е заинтересиран да остане со невидена спортска и финансиска понуда. Свесно презема споредна улога за да не го забави напредокот на младите и се согласува на помалку пари. Тие два фактора им се допаднаа на тренерот Карло Анчелоти и на претседателот на клубот Флорентино Перес“, се истакнува и се заклучува:
„Нему му штети и евентуалното доаѓање на Килјан Мбапе. Ова за него значи поголема конкуренција и помала минутажа. Постои ризик следната сезона да игра уште помалку и повеќе да биде на клупата. Хрватот го прифати ова и тоа е. Ниту парите, ниту минутите не се проблем за него, со оглед на тоа што го дава во последниот половина час, кога ќе влезе во играта.
Модриќ во Реал игра од 2012 година. Со клубот освои 25 трофеи. Во историјата на Реал само уште тројца играчи освоиле толку многу титули, Марцело, Карим Бензема и Начо Фернандес.
