Живот

Како максимално да го искористите денот?

17. февруари 2020 - 9:28 | М.С.

Иако можеби сметате дека вашата работа ви го одзема целиот ден и дека на другите активности може да се посветите само во сабота и недела, фактот дека тоа не е точно може да ве развесели.

Иако осум часа поминати на работното место не се малку, денот има 24 часа, па дури и кога ќе ги вброите и часовите поминати во спиење, ви останува доволен број на часови кои може да ги организирате на добар начин.

Следните три навики ќе ви помогнат максимално да го искористите секој ден и да не чекате да пристигне викендот туку да почнете со остварување на обврските уште од понеделник.

Запишете ги сите обврски во планер

Сето она што мора да го направите по работата: од заминување на преглед до купување на намирници и плаќање на сметки - запишувајте го во вашиот планер. Откако ќе пресметате колку време ви треба за секоја обврска, ќе знаете колку време ви преостанува за да се одморите, да тренирате и за некоја друга активност.

Активно искористете го слободното време

Понекогаш сакаме да изгледаме неколку епизоди од омилената серија и да не правиме ништо до утрешниот ден, но тоа не е добро доколку ни стане секојдневие. Наместо серии и филмови прочитајте некоја книга која би можела да ви помогне во професионалното усовршување, учете странски јазик, одете на кратки излети и слично.

Спојте го задоволството со корисното

Можеби имате талент за цртање, пеење, шминкање и слично, но самите сте се увериле себеси дека немате време за вашата омилена активност.

Кога ќе сфатите дека ова хоби може да ви донесе добра заработка, тоа може да ви биде инспирација за да се усовршувате уште повеќе. За кратко време ќе сфатите дека имате време за сè, но вашите обврски не биле правилно распределени.

Коментирај