Поминаа три недели од експлозијата по концерт на Аријана Гранде во арена во Манчестер каде загинаа 22 лица. Десет дена подоцна младата поп-ѕвезда се врати во градот уште потресен од трагедијата и одржа хуманитарен концерт во чест на жртвите и за помош на нивните семејства.
Концертот на кој се приклучија редица славни музичари како Џастин Бибер, Колдплеј, Мајли Сајрус и други, имаше огромна посетеност и покажа дека љубовта и сплотеноста се посилни од омразата.
Сега градот Манчестер ѝ ја возвраќа љубовта на Аријана по концертот One Love Manchester.
Денес Градскиот совет на Манчестер соопшти дека Аријана Гранде ќе добие почесно жителство на градот, во знак на благодарност и како признание за нејзиниот придонес за градот по ужасниот терористички напад.
Почесното жителство ќе биде дел од новиот план што го предлага Советот за да им се оддаде почит на луѓе надвор од Манчестер кои дале „посебен и значаен придонес“ за градот.
Предлозите ќе се разгледуваат на 12 јули кога е закажал следниот состанок на Советот во полн состав.
Аријана доби многу пофалби за нејзината ангажираност и храброст да се врати во Манчестер, а веста за почесното жителство исто така беше примена со радост на социјалните мрежи.
