Наука

Како Марс останал без вода?

23. мај 2019 - 14:36 | Б.С.Б.

Во атмосферата на Марс постои дупка која се отвора на секои две години и низ неа минуваат резервите вода од оваа планета.  Ова објаснување го објави тим руски и германски научници кои го проучуваат чудното однесување на водата на Црвената планета.

Научниците воочиле дека постојат многу испарувања во атмосферата на Марс и дека таа вода мигрира на половите на планетата. Досега немало друго добро објаснување како циклусот на вода функционира на Марс или зошто некогаш поплавената планета сега е сува. Присуството на вода над Марс е необично, бидејќи средниот слој на атмосферата изгледа како да би требало да го прекине текот на водениот циклус на Марс.

„Средниот слој на атмосферата на Марс е премногу студен за да го издржи испарувањето на водата“, стои во студијата.

Како тогаш водата минува низ тој среден слој? Одговорот што научниците го добија од компјутерските симулации има врска со два атмосферски процеси, уникатни за Марс. На Земјата летото во северната хемисфера и во јужната хемисфера е слично. Тоа не е така на Марс. Поради тоа што орбитата на Марс е многу повеќе ексцентрична отколку орбитата на Земјата, исто така е и поблиску до Сонцето во текот на летото на јужната хемисфера. Тоа се случува на секои две години. Летата во тој дел на планетата се многу потопли отколку летата во северната хемисфера. Судејќи според истражувачките симулации во атмосферата на Марс се отвора дупка на висина меѓу 60 и 90 километри. Оваа дупка дозволува водата да побегне во горната атмосфера.

Марс е поинаков и поради песочните бури. Овие бури ја ладат површината блокирајќи ја светлината. Светлината која не достига на површината на Марс се заглавува во атмосферата, се загрева и создава поволни услови за испарување на водата.

„Ова би можело да биде приказната за тоа како некогаш поплавениот Марс останал сув во текот на моменталната епоха“, велат научниците во студијата.

Коментирај