Mercedes отсекогаш бил иноватор на многу нови технологии и системи што денес се стандард во автомобилската индустрија. Најдобар пример за тоа е концептуалниот модел F200 Imagination од 1996 година.
Многу иновации во автомобилската инустрија најпрво се појавуваат на концептуални модели, а по години, а некогаш и децении, си го наоѓаат своето место во продукциските модели.
Сепак, некои замисли се премногу смели и надвор од стандардите, што никогаш не стигнуваат до сериските автомобили.
Еден од концептите што своевремено привлече големо внимание кај вљубениците во автомобили беше од 1996 година.
Ова луксузно купе беше претставено на саемот за автомобили во Париз пред 22 години, со 6.0-литарски V12 мотор со 400 кс.
Иако имал импресивни 400 коњски сили, моторот не бил она што привлекувало најголемо внимание кај овој автомобил – тоа биле џојстиците со кои се управувало возилото наместо волан.
Приказната за F200 почнува во 1991 година кога Mercedes ја почнува серијата футуристички концепти со ознака F. Првиот беше F100, а 5 години подоцна беше претставен и F200 Imagination.
Една од најважните иновации беше страничното воздушно перниче како завеса, а предното перниче за возачот беше под контролната табла, со оглед на тоа дека моделот нема волан.
Како многу денешни концепти, Mercedes F200 Imagination немаше надворешни ретровизори, туку користеше камери поставени во задните носачи на кровот.
Сепак, најатрактивна карактеристика на моделот беа управувачките џојстици – едниот од левата страна, во вратата на возачот, а другиот на централната конзола, за да може со возилото лесно да управуваат и возачи леваци. И двата имаа иста функција – со туркање напред се даваше гас, со повлекување назад се кочело, а вртењето е со поместување на џојстикот лево, односно десно.
На џојстиците имаше и други копчиња за команди што инаку се на рачките зад воланот, како вклучување трепкачи, фарови или бришачи.