Експертите кои го проучуваат мутирањето кај коронавирусите открија над 10.000 различни геноми на смртоносниот патоген и создадоа сеопфатна мапа што ќе биде од клучно значење за контролирање на пандемијата и наоѓање лекови за болеста COVID-19.
Од декември кога беше анализиран првиот примерок на вирусот во Вухан, Кина, интернационални тимови научници со помош на филогенетика го создадоа огромното генеалошко „дрво“ на вирусот Sars-CoV-2 кој ја предизвикува болеста COVID-19, што открива како се рашири од епицентарот на епидемијата до сите делови на светот.
„Геномската епидемиологија ќе биде витална алатка во напорите на човештвото да се справи со COVID-19 и да го врати светот во нормала“, вели Ема Ходкрофт, еволуциски генетичар од Универзитетот Базел во Швајцарија која е дел од проектот за мапирање Nextstrain.
„За почеток, ќе биде од инструментално значење во напорите за разликување на локалните и увезените зарази во периодот додека излегуваме од карантини.“
Мапата на мутации ќе се користи за да се сознааат евентуалните последователни бранови на вирусот, кога ќе биде ставена под контрола пандемијата, но и за да се развијат лекови и вакцини кои ќе доведат до тоа.
Сите вируси мутираат и ниту една од промените во Sars-CoV-2 го нема сменето неговото однесување, ниту го направила поопасен, според досегашните сознанија.
„Луѓето зборуваат дека како што се шири и мутира новиот коронавирус се развиваат негови нови подвидови или родови (strains), но ние сметаме дека е опасно да се користат тие термини бидејќи тоа сугерира дека мутациите го прават вирусот повеќе или помалку пренослив или вирулентен“, вели д-р Ходкрофт.
Најдобри примери за географски диверзитет на COVID-19 може да се видат во Исланд каде се спроведени најмногу тестирања и анализи на геноми на Sars-CoV-2 во споредба со други земји, сметано по глава на жител.
Повеќе за истражувањата во Исланд може да најдете ТУКА и ТУКА, а целата сторија „Mutations map holds the key to bringing coronavirus under control“ на Financial Times може да ја најдете ТУКА.
