Некогаш еден од најдобрите фудбалери, Еден Азар пред седум месеци ја заврши својата играчка кариера, но британски Telegraph денес носи интересна вест.
Иако Азар одамна не се занимава со фудбал, Белгиецот му донесе профит од 5 милиони евра на Челси, лондонскиот клуб во чиј дрес некогаш брилираше.
Азар најави повлекување од фудбалот во октомври 2023 година, но договорот за трансфер на играчот помеѓу Челси и Реал Мадрид остана валиден за оваа сезона.
Во договорот имаше клаузула за бонус од 5 милиони евра што Реал треба да му ги плати на Челси доколку оваа сезона се пласира во финалето на Лигата на шампионите, а сега овие пари ќе им бидат исплатени на „сините“ од Лондон.
Азар се пресели од Челси во Реал Мадрид во летото 2019 година за 115 милиони евра, а сега добро ќе им дојде на „сините“ дополнителни пет милиони евра за да ги почитуваат правилата за финансиски фер-плеј кои се на сила во Премиер лигата.
Во Реал Мадрид по големиот трансфер Азар се покажа како голем неуспех бидејќи имаше огромни проблеми со повредите, па за четирите години колку што беше на Бернабеу забележа само 76 настапи, постигна 7 гола и забележа 12 асистенции.
