Почна сезоната на летни одмори, а со тоа и излежувањето на сонце и „фаќањето“ боја на некоја домашна или странска плажа. Со разни креми, масла и други препарати денес е лесно да добиете исончан тен, но треба и посебна нега како подолго да го зачувате.
Кожата изложена на сонце и (морска) вода, и покрај заштитните креми и масла за сончање, треба да ја негувате дополнително и по сончањето. Нахранете ја дехидрираната кожа со масла како бадемово, маслиново или масло од авокадо.
Млеката или масла за кожа на билна основа што може да ги најдете во речиси секоја продавница за козметички производи или во аптека, исто така се одлични за хидратација на кожата по сончање.
За подолго задржување на исончаниот тен се препорачува и масло од семе од морков, како и палмино масло бидејќи изобилуваат со бета-каротен.
После сончањето кожата може да почне да се лупи, поради што се препорачува да направите темелен пилинг пред да почнете со сончање за да го отстраните слојот мртви клетки. После сончање може да направите благ пилинг без многу притисок, а потоа задолжително потхранете ја кожата со масло или млеко.
Исончаната кожа мора редовно да ја освежувате со туширање со што е можно поблаги и поприродни гелови. Не се препорачува туширање со многу жешка вода бидејќи тоа дополнително ќе ја исуши кожата.