Во време кога Русите на секој начин се обидуваат да ја напуштат земјата поради мобилизацијата, а границите со неколкуте земји кои сè уште се отворени за руските граѓани се практично блокирани, Владимир Путин и Александар Лукашенко се сретнаа во Сочи, каде што белорускиот лидер имаше монолог за време на кој го привлече вниманието на неговиот руски колега на фактот дека неговите граѓани бегаат од војната.
На официјалната веб-страница на Кремљ е објавено видео од средбата на двајцата претседатели, а на неа се гледа како Путин нервозно тропка со ногата на подот, додека Лукашенко објаснува што се случува на границите.
Лукашенко го увери Путин дека ќе победи во војната во Украина и покрај проблемите кои постојано се трупаат во Русија.
Шефот на Кремљ изгледаше непријатно за време на монологот на Лукашенко. Тој на таа средба зборуваше многу малку, а главниот говорник беше Лукашенко.
„Нашата насока е правилна, нашата мисија е исправна. Ние ќе победиме. Немаме друг избор. Ние како Словени не би толерирале понижување“, му рекол Лукашенко.
Сепак, ситуацијата на терен е драстично поинаква. Повикот за мобилизација се покажа како крајно погрешен чекор, имајќи предвид дека стотици илјади Руси бегаат од земјата.
Појдовните летови од Русија се целосно распродадени, а сообраќајниот метеж што води до руските граници е толку голем што може да се види од вселената.
Низ земјата избија антивоени протести, а руските медиуми известуваат за зголемен број подметнати пожари во воените канцеларии.
Лукашенко исто така привлече внимание на овој проблем, посочувајќи дека оние кои не сакаат да војуваат - бегаат.
„Да речеме дека бегаат 30.000 или 50.000 луѓе. Да останат, дали ќе бидат наши луѓе? Нека бегаат. Не знам што мислите за тоа, но не бев премногу загрижен во 2020 година кога луѓето си заминаа“, му рекол Лукашенко на Путин.
Протестите во руските градови резултираа со околу 2.000 апсења.