Сите модели на италијанскиот производител на суперспортски автомобили се изработуваат во гратчето Сант Агата во Италија.
Во изминативе години Lamborghini бележи постојан раст на производство и продажба, а откако долго време гамата на италијанскиот производител се состоеше од две имиња, стигна и новиот кросовер Urus.
Во првата половина на 2018 година, продажбата порасна за 11% во споредба со истиот период лани. Во првите шест месеци од оваа година на купувачите ширум светот им беа испорачани 2.327 автомобили, и тоа најмногу примероци од моделот Huracan – дури 1.604 – а потоа 673 од Aventador, а останатите 50 се примероци од моделот Urus.
Целосното производство на Lamborghini се одвива во погоните во Санта Агата во Италија. Пред да биде претставен моделот Urus во 2017 година, фабриката беше проширена и сега нејзиниот капацитет изнесува 8.000 возила годишно.
Тоа е можеби скромен резултат ако се спореди со производството на компаниите кои прават автомобили за широките маси, но треба да се има предвид дека станува збор за егзотични суперспортски модели што чинат по неколку стотици илјади евра, па и повеќе.
Во тој контекст, планираното производство од 8.000 автомобили годишно е огромен успех ако се знае дека ривалите во оваа класа на автомобили произведуваат значително помалку возила. Исклучок е Ferrari со годишна продажба од околу 7.000 возила, но и со поголем број модели во понудата.
Како се создаваат моќните суперавтомобили Lamborghini може да погледнете во видеото на јутуберот Mr JWW кој беше во посета на италијанскиот автомобилски гигант.
