Светот повторно имаше можност да ги види необичните телохранители на севернокорејскиот лидер Ким Џонг Ун кои трчаат покрај неговиот блиндиран автомобил облечени во костуми.
Тие се повеќе од спектакл – кога станува збор за обезбедувањето на лидерот, Северна Кореја не остава ништо на случајноста.
На историскиот самит во Сингапур каде Ким ќе се сретне со американскиот претседател Доналд Трамп, сите очи ќе бидат вперени во Ким и неговите телохранители.
Телохранителите кои трчаат покрај лимузината на Ким и оние кои одат во три реда околу него, се дел од т.н. Централна партиска служба бр.6 или формално позната како Главна служба за аѓутанти.
Телохранителите се бираат од припадниците на Корејската народна армија каде регрутацијата е задолжителна.
Критериумите за да се биде дел од оваа елитна едница, пред сѐ се да бидат високи колку врховниот лидер и да имаат беспрекорен вид.
Овие човечки штитови се бирани внимателно заради нивните вештини – треба да се во одлична физичка форма, врвни стрелци, да знаат боречки вештини, но и да бидат убави и згодни.
На крај, избраните момци и девојки поминуваат и ригорозна проверка на минатото, нивно и на семејствата, две генерации наназад. Голем дел од припадниците на Централната партиска служба бр.6 се роднини на семејството Ким или на високата севернокорејска елита.
Ако бидат примени за позицијата телохранител на лидерот (нема опција да се одбие понудата), потоа поминуваат интензивен тренинг и обука, слични на оние на Специјалните оперативни сили.
Тука спаѓа ракување со огнено оружје, техники на спасување и евакуација и разни боречки вештини. Телохранителите поминуваат и интензивни предизвици за телесна и ментална издржливост, бихејвиорални тестови и физички ригорозни вежби.
Телохранителите формираат круг околу Ким со заштитен периметар во кој имаат поглед од 360 степени на луѓето околу него и на околината.
Како знак на моќта на режимот, телохранителите се дел од избраниот број луѓе кои смеат да носат оружје во близина на лидерот, и тоа обично е полуавтоматска пушка или резервен пиштол.
Покрај тоа што носат оружје, главната одбрана на телохранителите на Ким е нивната неверојатна вештина на набљудување и неутрализација на каква било опасност со нивните тела и раце.
Ким Џонг Ун има помалку телохранители од татко му.
