Руската федерална агенција за авиосообраќај „Росавијација“ отвори истрага за инцидентот во кој се запали авионот со фудбалерите на Саудиска Арабија.
Авионот на компанијата „Росија“ што ја превезуваше фубалската репрезентација на Саудиска Арабија на натпреварот на Мундијалот во Ростов на Дон се запали за време на летот, објави „Интерфакс“.
Портпаролот на „Росавијација“ изјави дека за време на слетувањето избила искра што предивикала пожар во еден од моторите на авионот, но слетувањето било изведено со двата мотори во оперативна функција и не била загрозена безбедноста на патниците.
„Росавијација ќе ги испита точните причини за овој инцидент и ќе ги опфати сите поврзани страни, вклучувајќи ја компанијата што го произведува моторот“, рече портпаролот.
Фудбалската федерација на Саудиска Арабија претходно објави дека авионот со фудбалската репрезентација на земјата безбедно слетал во Ростов на Дон каде го продолжува натпреварувањето на Мундијалот, по „технички проблем на еден од моторите“.
Портпаролот на авиокомпанијата „Росија“ чиј „ербас А319“ ги превезуваше фудбалерите од Санкт Петербург до Ростов на Дон, негираше дека избил пожар и рече дека според прелиминарните податоци, проблемот го предизвикала птица вшмукана во еден од моторите на авионот.
„Ништо не ја загрози безбедноста на патниците. Авионот слета рутински. Не беше огласен никаков аларм за време на слетувањето“, рече портпаролот на „Росија“.
Новинската агенција „Ројтерс“ наведува дека на снимките објавени на социјалните мрежи се гледа како гори крилото на авионот за време на летот.