Свет

Како Северна Кореја ја прикажа средбата Трамп-Ким пред својот народ?

14. јуни 2018 - 19:30 | А.С.

Севернокорејската државна телевизија објави досега невидени фотографии и видеа од неодамнешната средба меѓу лидерот Ким Џонг Ун и американскиот претседател Доналд Трамп во Сингапур.

КЦНА  објави документарен филм од 42 минути со сцени од патувањето на Ким со кинескиот авион и досега необјавени фотографии од него во луксузниот хотел во кој се сретна со Трамп.

Во некои кадрите се гледаат стотици Севернокорејци како страстно мавтаат со знаменца и ракоплескаат додека го гледаат слетувањето на авионот на лидерот во Сингапур за средбата со Трамп.

Филмот почнува со кадри во кои Ким се подготвува за летот со авионот што му го позајми кинеската влада.

„Многу лидери на разни земји го имаат посетено Сингапур, но во историјата на Сингапур не било видено улиците да се наполнат вака со народ кој дошол да посака добредојде“, вели нараторот во сцените кога се гледаат луѓе како се собираат на улица да го поздрават Ким.

Освен вообичаеното славење на севернокорејскиот лидер, документарецот се фокусира и на Сингапур како исклучително успешна капиталистичка држава, што претставува еден вид отстапување.

Севернокорејските медиуми досега се воздржувале од покажување на успехот на другите држави.

Коментирај