Дванаесетгодишниот Себастијан Филорамо од Венецуела со мала помош од татка си успеа да ги следи подвизите на својот омилен фудбалер Лионел Меси на Светското првенство и покрај тоа што нема сетило за вид.
Трогателното видео стана вирално и одушеви многумина.
Себастијан го изгубил видот кога имал само седум месеци, но тоа не го спречило да стане огромен фан на Меси и го следи секој натпревар на кој игра аргентинската суперѕвезда.
Во тоа успева со помош на татко му Мануел, кој му помага да ја опише акцијата на теренот со движење на рацете на момчето на фудбалската табла „на допир“. Станува збор за табла со релјефни испакнатини кои го потсетуваат момчето на фудбалско игралиште, па тој со помош на друго лице може да разбере каде е топката и кој играч ја има.
На овој начин Себастијан ја следеше играта на Аргентина и голот на Меси во нивната победа против Мексико, а на интернет се појави снимка од момент кога момчето се радуваше на голот, за која многумина признаа дека им ги „стопи“ срцата.
„Тој гол веќе не ме ни боли“, напиша еден фудбалски фан од Мексико.
Многумина го пофалија и таткото на Себастијан што му помогнал на својот син да го доживее овој прекрасен момент на среќа и му ја доделиле титулата „најдобар татко на светот“.
Инаку, Меси со овој гол ја врати Аргентина на вистинскиот пат по шокантниот пораз од Саудиска Арабија, по што следеше победа на оваа репрезентација против Полска.
