Талибанците заработија милиони од организацијата на Светското првенство така што обезбедиле градежна опрема за изградба на стадионите во Катар, пишува британскиот The Telegraph.
Високи функционери на талибанците парите добиени за мировни преговори ги користеле за купување, а потоа за изнајмување на тешки машини за изградба на стадиони во изминатава деценија, откри извор од канцеларијата на талибанците во Доха.
Значителен број на талибански лидери живеат во Доха, главниот град на Катар. Од 2013 година се вклучени во долготрајни мировни договори со САД и со ОН.
Светското првенство за нив е „златна кокошка“
„Талибанците вложија големи средства во изградба на стадионите за СП и турнирот за нив е „златна кокошка“. Исплатени им се милиони долари“, тврди анонимниот извор за Telegraph. „Некои талибанци имаа меѓу 6 до 10 големи машини во Доха и заработуваа до 10.000 фунти од машина месечно“, тврди изворот.
Властите во Катар, со одобрение од САД и од ОН, на членовите на талибанската политичка канцеларија во Доха им исплаќале месечна стипендија вредна илјадници фунти како дел од напорите да се олеснат мировните преговори со Западот.