Иако досегашните податоци за поврзаноста меѓу топлото време и ширењето на коронавирусот варираа, најново грчко истражување покажа дека вирусот помалку се шири во земјите со високи температури.
Студијата ја спроведе Клиниката за белодробни заболувања во Тесалија, во соработка со Центарот за интердисциплинарни истражувања на Националниот технички универзитет во Атина и Одделението за деловна администрација при Универзитетот во Патрас.
„Утврдивме јасно влијание на температурите врз брзината со која се шири болеста, бидејќи земјите со пониски температури и особено оние со просечна температура од 0 до 18°C имаат побрза појава на нови случаи на COVID-19 дневно и поголем вкупен број на потврдени заразени во споредба со земјите со повисоки просечни температури на воздухот“, вели професор Константинос Јургулијанис од Клиниката за белодробни заболувања во Тесалија.
„Според нашите анализи, се чини дека влијанието на температурите не зависи од времето на избивање на епидемијата и густината на населението“, вели тој и додава дека секако, конечниот број на случаи зависи многу од мерките преземени за спречување на ширењето на вирусот, како и од системот за евиденција во земјата.
Многу студии, наведува професорот, укажуваат дека ладното време помага вирусот да преживее и да се шири.
„Главни фактори кои ја поткрепуваат теоријата за влијанието на годишните времиња во ширењето на вирусните епидемии се зголемувањето на преносливоста на вирусот, ранливоста на човечкото тело и стабилноста на вирусните честички во околината во зимските месеци“, вели Јургулијанис.
Претходните студии укажуваа дека на повисоки температури се намалува периодот на преживување на коронавирусуте кои ги предизвикаа епидемиите на MERS и SARS-CoV.
