Американскиот претседател Доналд Трамп денеска во Ханој имаше средба со неговиот виетнамски колега Нгујен Фу Тронг, само неколку часа пред да се сретне со севернокорејскиот лидер Ким Џонг Ун.
Трамп и Тронг, кој е и генерален секретар на владејачката Комунистичка партија во Виетнам, се сретнаа во претседателската палата од колонијалниот период.
Двајцата лидери присуствуваа и на церемонија на потпишување неколку комерцијални трговски договори помеѓу авиоиндустриите на двете земји.
Во главниот град на Виетнам денеска почнува дводневниот самит на американскиот претседател и севернокорејскиот лидер на кој, спорeд најавите, главна тема ќе биде денуклеаризацијата на Корејскиот Полуостров.
Белата куќа соопшти дека Трамп и Ким денеска ќе имаат состанок „еден на еден“, што ќе трае 20 минути, додека сите други состаноци ќе траат околу два часа.
Според распоредот, 20-минутниот состанок ќе биде одржан во хотелот „Метропол“ во 18.30 по локално време (12.30 часот по средноевропско време), по што ќе следува вечера која ќе трае час и половина.
На улиците на Ханој мала група граѓани го поздравија доаѓањето на Трамп во земјата што има комплицирана историја со САД.
Тие носеа транспаренти со пријателски пораки за добредојде, а самиот Трамп во минатото има мешани изјави во врска со Виетнам.
Претседателот на САД не бил регрутиран во војската и не учествувал во војната во Виетнам бидејќи тогаш уште студирал, а потоа имал медицинска белешка со која „се спасил“ од служење војска.
Тој има изјавено дека Виетнам е прекрасна земја, но исто така има речено дека врските се „како да си во Виетнам“:
„Одењето на љубовни состаноци е како да си во Виетнам. Тоа е еквивалентот на тоа да си војник во Виетнам. Вистинска војна.“