Живот

Како успешно да одржите пријателство на далечина?

22. април 2019 - 17:29 | К.З.

Во последната деценија од нашата земја се отселија огромен број луѓе – млади, стари, студенти, работници, па и цели семејства. Можеби вие сте еден од оние кои го испратиле другарот во далечна земја, а можеби и самите сте се отселиле од родната земја. Каков и да е случајот, мора да одржувате здрава и редовна комуникација со пријателите, иако тие се далеку. Но, како да го направите тоа?

На пријателството му е потребна постојана нега и внимание, посебно кога е потребно да го одржувате на долги дистанци.

Однапред договорете ја комуникацијата

Истражување спроведено во 2008 година вели дека пријателствата на далечина делат исти карактеристики како реципроцитетот, односно дека едната страна споделува, комуницира и посветува внимание исто колку и другата страна. Поради временските зони, обврските и далечината, двете страни мора однапред да договорат време кое им одговара за да воспостават комуникација. Еднаш, двапати или петпати неделно, без разлика. Секогаш е добро да се слушнат пријателите.

Повеќе не е секогаш подобро

Иако понекогаш е добро да направите групен Skype повик со вашиот пријател во странство, тоа не е секогаш идеална идеја. Разговарајте со вашиот пријател или пријателка дали сакаат да разговаарат со вас во присуство на други луѓе или пак преферираат да ве слушнат само вас, насамо.

Емпатија

Потребна ви е голема доза на емпатија за да разберете како му е на пријателот од другата страна, без разлика кој од вас е во родната земја, а кој во некоја далечна, странска земја. Наместо да го преплавите со информации за случувањата во родниот крај, обидете се да разберете дека нему веројатно му недостасува тој дел од неговиот живот, па затоа бидете повнимателни во разговорот.

Памтете ги важните датуми

Годишнини, родендени, имендени и домашни слави, па дури и обично датуми кои имаат некакво значење во животот на пријателите – обидете се да ги запомнете сите нив за да одржите здрава и долга врска на далечина.

Не се ослонувајте само на технологијата

Апликациите како Facebook Messenger, Viber, Skype и WhatsApp навистина го олеснија процесот на комуникација со оддалечените пријатели и познаници, но не го ограничувајте вашето пријателство само на гледање преку екрани. Понекогаш, кога и да е тоа можно, направете напор да се видите со пријателите лично, лице в лице. Тоа ќе им значи повеќе отколку било каква порака на Viber.

Коментирај