На официјалната веб-страница на Вимблдон беа објавени две интересни фотографии на кои се гледа сличноста меѓу Новак Ѓоковиќ и неговиот син Стефан.
Семејството Ѓоковиќ моментално се наоѓа во Лондон, каде еден од најдобрите тенисери на сите времиња се обидува да ја одбрани титулата на Вимблдон, што воедно би бил негов 21 грен слем во кариерата.
Со него во Лондон се и сопругата Јелена, како и децата Стефан и Тара кои на секој натпревар му даваат поддршка на Новак. На споменатите две фотографии, кои ги објави Вимблдон на денот кога Ѓоковиќ не се натпреварува на турнирот, може да се види речиси идентичната техника на удар на тато Новак и синот Стефан.
Врвовите на прстите на десната нога се на тревата, додека левата нога е во воздух. Во слична положба е и левата, односно слободната рака во моментот на ударот.
„Одиме на 100-тата победа на Вимблдон, пред помладите да стапат на сцена“, твитна ПР службата на овој турнир.
Ѓоковиќ (3. АТП) се пласираше во 3. коло на Вимблдон откако синоќа го победи Австралиецот Танаси Кокинакис (79. АТП). По вкупно два часа игра беше 3:0 за Ѓоковиќ, а 6:1, 6:4 и 6:2 во сетови.