Рускиот тенисер Андреј Рубљов синоќа го совлада сонародникот Даниил Медведев во три сета, а по победата напиша порака на телевизиска камера која брзо го обиколи светот.
Рубљов повикува на мир од почетокот на руската агресија на Украина. Сега отиде и чекор подалеку и на телевизиска камера напиша порака која брзо стана хит на социјалните мрежи.
Обичај е во светот на тенисот играчите по победа да ја потпишат телевизиската камера што се наоѓа непосредно покрај клупата за играчи. Таа порака потоа долго се прикажува во директен пренос, а Рубљов го искористи тој момент за да повика на мир.
„Мир, мир, мир. Тоа е сè што ни треба“, напиша Русинот на камерата и предизвика големи овации кај публиката на завршниот Мастерс во Торино.
Исто така, се прослави и на социјалните мрежи каде многумина го пофалија овој гест.
Мечот меѓу двајцата Руси беше многу возбудлив.
