Португалскиот ас ја прифати богатата понуда на Ал Наср и од тој момент и саудиската лига доби важност. Соиграч на Роналдо сега му е поранешниот играч од средниот ред на Баерн, Луис Густаву, кој откри какви проблеми донел Португалецот во новиот тим.

„Сигурно дека доаѓањето на Роналдо може да ги отежни работите за сите нас бидејќи сега сите екипи се радуваат на играњето против него. Тој сите ги мотивира. Сите сакаат на тие натпревари да докажат нешто, а тоа нам ни ги отежнува работите. Но, сакаме да се натпреваруваме“, истакна Бразилецот.
„Роналдо уште сега ја подобри лигата бидејќи самите натпревари се многу подобри. Против нас сите се мотивирани да го покажат најдоброто од себе, а тоа покажува каков статус Кристијано има во фудбалот“, додаде.
35-годишниот Луис Густаву е сигурен дека од доаѓањето на Роналдо во Саудиска Арабија корист ќе имаат и клубот и играчите.
„Неговото присуство во Ал Наср ѝ дава голема предност на екипата бидејќи секој ден имаме шанса да учиме од него. Во живо гледаме какви способности поседува како играч, технички и физички. Постигна гол и се ослободи од притисокот, па сигурно сега ќе биде сѐ подобар и подобар“, смета поранешниот играч на Хофенхајм, Волфсбург, Марсеј и Фенербахче.
Роналдо со Ал Наср потпиша договор до летото 2025 година вреден 500 милиони евра, а пред некој ден го прослави својот 38. роденден.
По 15 одиграни кола Ал Наср го дели првото место со Ал Шабаб и Ал Итихад со по 34 бодови. Актуелниот шампион Ал Хилал има 32, додека Ал Таавон 30 бодови.