Без оглед на тоа кои се вашите фитнес цели, кревањето тегови веројатно се наоѓа во некој дел од вашиот фитнес план.
Вежбањето е многу важно, особено за оние кои сакаат да се ослободат од масните наслаги и да го обликуваат телото. Тренингот за сила или кревањето тегови помага во согорувањето маснотии, ги обликува мускулите и согорува калории. Исто така, има долгорочни придобивки како што се зајакнување на коските, одржување на здравјето на срцето и зголемување на целокупната флексибилност.
За почетниците и оние кои се опоравуваат од повреда, кревањето тегови е најбезбедна опција бидејќи има минимални шанси да им предизвикате преголем напор на зглобовите. Сепак, иако има многу придобивки, како што важи и за речиси сѐ друго, кревањето тегови мора да биде умерено.
Не смеете да кревате тегови секој ден затоа што на тој начин вашите мускули нема да го добијат периодот на одмор и заздравување, кој е многу важен. Мускулите всушност не се зајакнуваат додека кревате тегови, туку за време на одморот помеѓу тренинзите. Имено, тогаш се одвива процесот на синтеза при што клетките произведуваат протеини кои го стимулираат растот на силните мускули, пишува Livestrong.
Кога не им давате на вашите мускули барем еден слободен ден помеѓу тренинзите, се намалува времето што им е потребно на клетките на вашето тело за опоравување и создвање нови протеини.
Ако одредена мускулна група особено многу ве боли, тоа значи дека се опоравува од тежок тренинг.
За да ги избегнете негативните симптоми на честото кревање тегови, како што се прекумерен замор, намалени перформанси, нарушувања на расположението и спиењето, како и повреди, оставајте барем еден слободен ден за одмор меѓу тренинзите со тегови.
Во слободните денови вежбајте флексибилност и зајакнување на средишните мускули, преку јога или пилатес вежби.
