Руската Федерација ѝ донираше 30 тенкови T-72MS на Србија, а првите веќе се испорачани. Станува збор за донација вредна околу 30 милиони евра.
Како што рече поранешниот министер за одбрана Александар Вулин во мај минатата година пред воената парада во Ниш, кога беше прикажан овој тенк, Србија доби тенкови Т-72 како донација во рамките на воено-техничкиот договор постигнат меѓу претседателот на Србија Александар Вучиќ и неговиот руски колега Владимир Путин. Тој потоа додаде дека благодарение на таа донација, српските оклопни единици ќе бидат „значително подобрени и зајакнати“.
Како дел од воено-техничкиот договор, Србија покрај овие тенкови и други оклопни возила, од Русија доби и 30 оклопни возила BRDM-2, од кои некои веќе пристигнаа во Србија.
Најголемата и најважна новина е фактот дека Српската армија за прв пат ќе има тенк со активен-реактивен оклоп.
Станува збор за тенкови со можност за лансирање ракети од топовски цевки со калибар од 125 милиметри, а имаат и споен митралез од 7,62 милиметри, кој се наоѓа покрај топовската цевка и го следи вртењето на куполата, како и митралез од 12,7 милиметри на врвот, кој ротира независно од куполата.
Еден од најпознатите производи на руското наоружување кој стигнува во Србија, ќе има посилен мотор и подобра електронска опрема. Унапредениот тенк Т-72 исто така ги потврди своите можности на бојното поле, и се покажа како неуништлив во Сирија.
Моќта на овој тенк најдобро се покажа на вежбата одржана на полигоните Албино, Головенка и Мулино во околината на Москва.
Руските тенкисти ја вежбаа брзината на реакција на тенковите Т-72 и Т-80, односно за колку време тие можат да погодат цел што се појавува само за момент.
На метите оддалечени од 700 метри до 2 километри, се гаѓаше со топовски гранати и тенковски митралези.