Калафјори потпиша за Арсенал и порача: Играм како Стоунс, се надевам ќе освојам трофеи

Италијанскиот репрезентативец Рикардо Калафјори, еден од играчите кој беше вистински хит на ЕУРО 2024, беше претставен како нов играч на Арсенал.

22-годишниот стопер на Болоња веќе се приклучи на тренинзите на Арсенал и во првото обраќање до навивачите истакна дека сонот му се остварил.

„Сонував за ова кога имав 12 години. Мислам дека ова е најдобриот проект за мене во следните неколку години. Мислам дека ќе се подобрам како играч и се надевам дека ќе освојам трофеи“, рече Калафјори, кој го избра бројот 33 на дресот.

На прашањето да им се претстави на навивачите на Арсенал и што можат да очекуваат од него, Калафјори рече:

„Играм како Џон Стоунс, така би се опишал себеси. Сакам да ја движам топката напред доколку тоа го побара тренерот“, изјави Италијанецот.

Арсенал ѝ плати на Болоња 40 милиони евра, плус 5 милиони преку бонуси. Калафјори пристигна во Болоња од Базел на почетокот на минатата сезона и одигра 33 натпревари за калчолигашот кој беше хит ланската сезона изборувајќи пласман во Лигата на шампионите. Пред Басел играше и за Џеноа како позајмен, а е дете на Рома.

Дефанзивецот само годинава дебитираше за Италија и досега забележа 5 настапи, од кои 4 беа на Европското првенство.