Почна Светското клупско првенство каде во првото коло домаќинот го совлада шампионот на Океанија по 120 минути игра.
Катарскиот клуб Ал-Сад, кој како шампион на земјата домаќин игра на Светското клупско првенство, се намачи во првото коло против симпатичниот тим на Јанген од Нова Каледонија.
Тимот на чија клупа седи познатиот Чави го отвори резултатот во 26-тата минута преку Алжирецот Бахдад Бунеџах, а набрзо потоа постигна и втор гол кој беше поништен поради офсајд.
Аматерскиот тим на Јанген покажа дека е не залутан на првенството и на двапати се закани, прво преку Џеферсон Дахити, а потоа и преку Антоан Роине. Малку фалеше да постигнат и неверојатен гол со ножички кога Жозеф Атале се обиде со таква атракција, но домашниот голман Саад Ал-Шиб беше претпазлив.
Веднаш по паузата шок за Ал-Сад. Роине го доби дуелот со Буалем Хухи и со прецизен удар го совлада Ал-Шиб израмнувајќи на 1:1.
Потоа Ал-Сад ја презема контролата, но не успеваше да погоди за победа. Голот на Хасан Ал-Хајдос беше поништен од ВАР поради офсајд, па натпреварот отиде во продолженија.
Дека сепак фудбалот во Нова Каледонија е навистина аматерски се погрижија Седрик Сансо и голманот Бернар Каи. Една вратена топка од Сансо заврши во рацете на Каи и Ал-Сад доби индиректен удар кој со топовски удар Абделкарим Хасан го прертвори во водство точно во 100-тата минута. Четири минути подоцна Педро ги постави конечните 4:1.
Јанген по само еден натпревар се враќа дома, додека Ал-Сад оти во второто коло каде задутре ќе игра против шампионот на Северна Америка, мексикански Монтереј. Истиот ден прво ќе се сретнат шампионите на Азија и Африка, саудискиот Ал-Хилал и тунискиот Есперанс.