Група од неколку лица на возраст од 16 до 20 години каменувале автобус со број 55 на булеварот „Методија Андонов Ченто“, на надвозникот кај „Агросервис“ на влезот на населбата Ченто.
Вчера во 22,40 часот Е.Ј.(61) пријавил во полиција дека група од неколку лица на возраст од околу 16 до 20 години го каменувале автобусот со број 55, кој што сообраќа на линијата Транспортен центар- село Арачиново во моментот кога дошол на надвозникот движејќи се во правец кон Арачиново.
Притоа биле искршени две стакла на левата страна од автобусот и стаклото од задната двокрилна стаклена врата од автобусот, како и едно стакло на десната страна од автобусот.
Од удар од еден од камењата, била повредена З.Г.(45) која се здобила со повреди на левата аркада во вид на расекотина и крвавење и веднаш потоа била префрлена во Градската општа болница „Свети Наум Охридски“. По укажаната лекарска помош била пуштена на домашно лекување.
Со оштетувањето на автобусот сторителите причиниле материјална штета од околу 61.000 денари.