Бразилскиот дефанзивец Дани Алвес е приведен поради тоа што неколкупати ја промени изјавата откако беше обвинет за силување девојка, а шпанските и бразилските медиуми објавија нови детали за случајот со ова тешко кривично дело.
Алвес првично рекол дека ништо не се случило меѓу него и девојката и дека воопшто не ја познава, а откако бил уапсен и дал изјава во полиција, дал двa нови и различни искази.
Прво изјавил дека девојката случајно ја затекнал во тоалетот на ВИП делот на клубот и дека немало никаков контакт меѓу нив, додека во вториот исказ, откако се појавиле видеата, истакнал дека во тоалетот на клубот имал секс со девојката, со нејзина согласност.
Снимката од надзорните камери е клучен доказ во истрагата, бидејќи покажува дека Бразилецот и жртвата на нападот 15 минути биле истовремено во тоалетот, пренесува шпански Periodico.
„Во клубот ја фатил цврсто за раката и барал да го фати за меѓуножјето. Тоа го направил двапати, и покрај тоа што таа му се спротивставувала. Алвес потоа ја фатил за рака и ја одвлекол во тоалетот. Оттаму таа се обидела да побегне, но Алвес ја затворил вратата и ја спречил во тоа. Жртвата изјавила дека Алвес ѝ го подигнал фустанот, побарал да каже дека е неговата 'мала курва' и ја принудил да седне врз него. Потоа ѝ удрил шлаканица, ја фрлил на под и пенетрирал во неа додека не ејакулирал. Потоа ѝ рекол да почека додека тој не излезе од тоалетот“, тврди Periodico од свои извори.
За потсетување, Даниел Алвес да Силва се соочува со затворска казна од 4 до 12 години доколку на судењето биде прогласен за виновен.
