Поранешниот британски премиер Дејвид Камерон имплицираше дека Русија ја добила организацијата на Светското првенство во фудбал годинава по пат на корупција, влошувајќи го дополнително односот помеѓу Лондон и Москва.
Апликацијата на Англија беше одбиена во првата рунда од гласањето во 2010 година, а Русија го доби правото за првпат да организира Светско првенство, кое почнува годинава на 14 јуни.
Поранешниот премиер Дејвид Камерон зборуваше пред присутните од Министерството за надворешни работи во Четхам Хаус, и кажа дека плановите на неговата влада биле нарушени од нефер и нечесни политики.
„Корупцијата застана на патот на работите кои сакавме да ги постигнеме. Сакавме да ја отстраниме екстремната сиромаштија во светот. Но, што ги запре најсиромашните земји во светот како Судан и Бурунди да ја претворат паричната помош во храна или здравствено осигурување? Одговорот: корупцијата.
Сакавме да им помогнеме на земјите да се извлечат од сиромаштија. Но, зошто земји како Екваторијална Гвинеја и Венецуела се толку сиромашни иако имаат толку многу руда и миндерали? Одговорот: корупцијата.
Сакавме да организираме спортски настан кој ќе ги зближи луѓето и ќе ги сплоти заедно. Но, како Русија ја доби организацијата на Светското првенство? Одговорот? Ќе ви оставам самите да извадите заклучок“, рече Камерон пред присутните во Четхам Хаус.
Корупцијата не е непозната во организација како ФИФА, која во последните неколку години мораше да се збогува со неколку членови, меѓу кои и претседателот Сеп Блатер, поради обвиненијата и пресудите за вмешаност во корупција.