Владата на Канада, предводена од премиерот Џастин Трудо, одлучи значително да ја промени својата имиграциска политика, која беше меѓу најлибералните во светот.
Трудо ги промовираше придобивките од масовната миграција за време на неговото деветгодишно владеење, но политиката стана длабоко непопуларна во Канада.
Со цел да се обиде да ја „спаси“ својата партија од сигурен пораз на изборите, закажани за 2025 година, Трудо најави огромна промена во имиграциската политика на Канада.
Имено, беше лансирана рекламна ТВ-кампања на 11 различни јазици, вредна 250 илјади канадски долари, во која на потенцијалните мигранти им се сугерира да не доаѓаат во Канада.
Мигрантите често се обвинуваат за високите цени на становите, иако некои експерти тврдат дека ова е поедноставено објаснување, а анкетите покажуваат дека се поголем број Канаѓани веруваат дека земјата пречекува премногу нови жители.
Четиримесечната кампања има буџет кој е една третина од вкупната сума потрошена за слични реклами во претходните седум години.
Пребарувањата како „како да побарате азил во Канада“ и „Канада за бегалци“ ќе активираат спонзорирана содржина насловена „Канадски систем за азил – факти за азил“, соопшти Министерството.
„Аплицирањето за азил во Канада не е лесно. Постојат строги барања за да се квалификувате. Дознајте што треба да знаете пред да донесете животна одлука“, стои во еден оглас.
Канада долго време се сметаше за добредојдено место за новодојденците. Сега лидерите ја намалуваат имиграцијата и се обидуваат да ги принудат привремените жители да заминат, како и да ги спречат луѓето кои „бегаат“ од новоизбраниот американски претседател Доналд Трамп да бараат азил.
