Канадските навивачи ја исвиркаа американската химна неколку часа по одлуката на Трамп

Неколку часа откако претседателот на САД, Доналд Трамп, најави воведување високи царини за канадски увоз, а по контроверзните предлози на Трамп Канада да стане 51-ва американска држава, незадоволството меѓу Канаѓаните станува сѐ повидливо, дури и во спортските арени.

За време на натпреварот во Националната хокеарска лига (НХЛ) во Отава каде домашниот тим Отава Сенаторс ја пречека Минесота Вајлд, канадските навивачи ја исвиркаа американската химна. Слична сцена беше повторена и за време на кошаркарскиот натпревар меѓу Торонто Репторс и Лос Анџелес Клиперс, каде свирежите го задушија настапот на пејачот, а од друга страна, канадската химна беше интонирана со необичен жар и ентузијазам.

Администрацијата на Трамп воведе царини од 25% за сите канадски увозни производи во САД, со дополнителни 10% за енергетските производи, предизвикувајќи стравувања од сериозна трговска војна на северноамериканскиот континент. Економските аналитичари предупредуваат дека тоа може да има сериозни последици не само за Канада, туку и за американските потрошувачи, кои би можеле да се соочат со повисоки цени на горивото и основните потреби.

Покрај економските последици, одлуката на Трамп доаѓа и во контекст на неговите претходни изјави дека Канада треба да стане 51-ва американска држава – што претходно се сметаше за политичка провокација, но сега добива нова тежина.

Додека економските експерти предвидуваа значителен удар за канадската економија, политичките лидери во земјата, вклучително и премиерот Џастин Трудо, ги повикаа граѓаните да покажат солидарност. „Многу од нас ќе бидат погодени од ова и ќе имаме тешки моменти. Ве молиме бидете тука еден за друг. Сега е време да ја изберете Канада“, рече Трудо.