Откако беше соопштена веста дека медиумски работник е заразен со COVID-19 и тој бил во контакт со лидерите на СДСМ и ВМРО-ДПМНЕ, Канал 5 излезе со потврда дека се работи за вработен во телевизијата.
„Свесни сме за тежината на актуелната ситуација, поврзана со светската пандемија на коронавирусот која зема замав и за жал , исклучок не беше и еден наш колега, Гоце Михајлоски.
Како професионална и одговорна компанија , која сигурно ќе го надмине и овој сериозен предизвик, потенцираме дека и ние самите сме изненадени од ваквиот развој на настаните, поради фактот што првиот тест кој го изврши колегата Михајлоски беше негативен“, стои во соопштението.
Понатаму, од Канал 5 објаснуваат дека викендот на 28 и 29 март оваа година, Михајлоски бил во посета на своте родители во Прилеп, од каде во понеделникот, на 30 март, продолжил со работа во дневно-информативната редакција, „без никакви елементарни сомнежи ниту симптоми“.
„Потенцираме дека подолг период веќе имаме воспоставено високи стандарди на заштита и контрола на нашите вработени, во смисол: задолжително мерење на телесна температура при влез во компанијата, обезбедивме дезинфекциони пунктови на 5 локации, на секој кат, дополнително и во информативната редакција, задолжително работниот процес се извршува со помош на заштитни маски, а за делот на техниката и новинарите се обезбедени и пластични визири , за дополнителна заштита. Во четвртокот и петокот, во емисијата САМО ИНТЕРВЈУ, гости му беа Зоран Заев и Христијан Мицкоски, последователно, при што беа запазени сите протоколи“, се вели во соопштението од Канал 5.
Првите симптоми кај Михајлоски се појавиле на 5 април, во форма на малаксаност, замор и главоболка, по што веднаш околу 17.00 часот го напуштил работното место.
„Од понеделник, 6 април, на барање на компанијата, колегата е во самоизолација а во меѓувреме тој забележува температура повисока од 38 степени, и бара од својот матичен лекар да добие упат за тестирање, но поради електронската анкета, нема доволни симптоми за да биде упатен на тестирање. На 7 април, во утринските часови, поради зголемената температура прави тест преку крв во една приватна болница, кој покажува дека е негативен на коронавирусот. Во четврток, 09.04.2020 колегата Михајловски заминува во Воена болница , каде е примен, а утринава не информираше дека сепак е позитивен на COVID-19“, објаснуваат од Канал 5.
Понатаму во соопштението се вели дека медиумот благовремено ќе ја известува јавноста за сите новонастани моменти, а на колегата Гоце Михајлоски му посакуваат да се опорави што е можно побрзо.
