Американската рап ѕвезда предизвика контроверзии со критиката која ја упати кон движењето „Black Lives Matter“ откако се појави во маичка со натпис „White Lives Matter“.
Канје Вест, раперот познат по низа контроверзии и големото богатство кое го собра, предизвика нов бран на гнев откако го обвини „Black Lives Matter“ (BLM) движењето дека е „измама“, а претходно испровоцира онлајн притисок појавувајќи се во маичка со испишано „White Lives Matter“ (белите животи се важни).
„Сите знаат дека 'Black Lives Matter' беше измама. Сега тоа е завршено. Нема на што“, напиша 45-годишниот рапер на Instagram пост кој подоцна го избриша.
Напишаното очигледно беше одговор на критиките кои Вест ги доби откако во понеделникот ја носеше „White Lives Matter“ маичката за време не неговото Yeezy модно шоу во Париз, Франција, на кое беше промовирана новата Yeezy линија и каде манекенки продефилираа облечени во маици на кои беше испишан контроверзниот анти-BLM слоган. Дополнително, Вест беше фотографиран заедно со црномурната конзервативна инфлуенсерка Кендајс Овенс облечена во иста маичка со испишано „White Lives Matter“ на задната страна и слика на папата прикажана на предната страна.
„Одлуката на Канје Вест да носи 'White Lives Matter' маичка е одвратно, опасно и неодговорно. Некои од вас ќе се стрчаат да го бранат. Треба да се запрашате себеси зошто...“, објави на Twitter црномурниот писател и професор Марк Ламонт Хил.
Раперот Џејден Смит, син на глумците Вил Смит и Џада Пинкет Смит, во знак на протест си замина од модното шоу на Канје. „Вистинските лидери водат. Не ми е гајле кој е. Ако не ја чувствувам пораката, напуштам. Црните животи се важни“, рече Смит.
BLM движењето го тресат низа финансиски скандали. На пример, новиот предводник на националната непрофитна организација BLM, Шаломаја Бауерс, беше обвинет во тужба дека проневерил повеќе од 10 милиони долари донирани пари за да ја плати својата консултантска фирма. Коосновачката на BLM, Патрис Кан-Калорс, силно заплива во водите на недвижниот имот минатата година, купувајќи 4 домови за вкупно 3,2 милиони долари. Беше обвинета и дека им платила на нејзиниот брат и таткото на нејзиното дете повеќе од 1,8 милиони долари вкупна сума поради давање услуги на BLM. Движењето доби повеќе од 90 милиони американски долари во донации во 2020 година.
Вест, кој претходно си го промени името во Је, се води како најбогат рапер во светот со богатство проценето на 2 милијарди според Forbes, најмногу поради неговиот моден бренд Yeezy. Често предизвикува контроверзии, како кога го посети тогаш претседателот Доналд Трамп во Овалната соба во 2018 и истата година во интервју изјави дека ропството било „избор“ за афроамериканците.
