Хрватска ја победи Аргентина со 3:0 во второто коло од Светското првенство во Русија и се пласираше во осмина финалето. Аргентинските медиуми за дебаклот го обвинуваат Лео Меси, капитен на репрезентацијата и еден од најдобрите фудбалери на светот.
Спортскиот весник „Оле“ во текстот со наслов „Кошмарот на Меси“ пишува: „Капитенот повторно беше отсутен, играше лошо, само се појави на натпреварот од кој излее гледајќи в земја. Со таков Лео немавме шанси за победа.“
„Оле“ нагласува дека „аргентинската репрезентација не знае да се носи со фрустрација, а истиот проблем го има и Меси.“ Тој не е виновен што голманот Кабалеро им го подари првиот гол на Хрватите, но е виновен што не покажа сила и бунтовен дух за да го крене моралот на екипата пред и по првиот гол.
„Точно е дека Меси нема со кого да игра, бидејќи Павон и Дибала влегоа предоцна во игра. Беше изгубен. Неговите зелени копачки беа единсствената работа по која се истакна на теренот против Хрватска, во поразот по кој Аргентина е на раб да излезе од СП. А да не забораваме дека едвај се пласираше.“
Исто така, медиумите потсетуваат и дека аргентинската репрезентација премногу зависи од Меси.
„Сите гледаат во него и очекуваат од него да направи сѐ. Но, Меси се исклучи, а со него и репрезентацијата. Се знаеше дека оваа репреентација може да направи нешто на СП само ако е добра нејзината ‘десетка’. Но, на првите два натпревари, водачот беше невидлив.“
„Оле“ предупредува и на говорот на тело на Меси што цело време го оддава во каква состојба е, како и на несфатливото однесување по натпреварот со Хрватска.
„Го закова погледот во земја, што е недозволиво за кого било, уште помалку за водачот на екипата. Секогаш е со соборен поглед и иако е капитен, прв ја напушти екипата што тоне и побегна во соблекувална. Но, неговиот кошмар уште не е завршен.“