Нов предизиборен антимакедонски испад на бугарскиот премиер Красимир Каракачанов во обид да си го зголеми пренискиот рејтинг кај бугарските гласачи.
Утринава на својот Facebook профил објави список на македонски граѓани, меѓу кои и политичари, за кои вели дека имаат право на глас на претстојните избори бидејќи се бугарски државјани. А, бугарско државјанство извадиле врз основа на докажано бугарско потекло, и според тоа, тој вели дека самоиницијативно се определиле дека се етнички Бугари.
„Над 120.000 граѓани на Република Северна Македонија се и бугарски граѓани и имаат право да гласаат на претстојните парламентарни изборни. Во избирачките списоци се запишани сите бугарски граѓани со право на глас. Деновиве пребарував по сајтовите на бугарските општини и открив многу интересни имиња на луѓе од Македонија, кои се здобиле со бугарско државјанство врз основа на докажано бугарско потекло и со тоа се самоопределуваат како етнички Бугари“, пишува Каракачанов.
Објави и дел од имињата, за кои, сепак, наведува дека можеби и се случајно идентични како некои политичари во Македонија.
„Меѓу некои на имињата на кои наидов се на пример:
Александар Николоски - запишан во реонот Средец - Софија,
Антонио Милошоски - запишан во реонот Взраждане - Софија,
Александар Пандов - Средец,
Петар Богојески - Обориште,
Филип Петровски - Средец.
Има уште многу други, па секој што сака може сам да провери како за себе, така и за секоја друга личност, било од Македонија или не“, додава.
Над 120 000 граждани на Република Северна Македония в качеството си и на български граждани ще имат право да гласуват на...
Posted by Красимир Каракачанов on Wednesday, March 10, 2021
На објавата на бугарскиот премиер реагираше ВМРО-ДМПНЕ:
„ВМРО-ДПМНЕ најостро ги демантира лагите кои Красимир Каракачанов ги објавува на својот Facebook профил. Ниту еден од посочените функционери на ВМРО-ДПМНЕ нема бугарски пасош, што само покажува дека неговата денешна објава е класична лажна вест“, соопшти македонската опозициска партија.
„Очигледно дека Каракачанов воден од својата антимакедонска политика има за цел да оцрнува и да фабрикува невистини против функционери на ВМРО-ДПМНЕ и против партијата, бидејќи ВМРО-ДПМНЕ е политичка партија во Македонија која остро се спротивставува на неговите негации на македонскиот јазик, македонскиот народ, македонскиот идентитет и македонската историја, се додава во партиското соопштение.