Италијанскиот министер за здравство Роберто Сперанца рече дека националниот карантин наметнат за ограничување на ширењето на коронавирусот ќе биде продолжен барем до Велигден.
Велигден за католиците е оваа година на 12 април, а тековните рестриктивни мерки истекуваат на 3 април. 13 април во Италија е неработен ден.
Министерот рече дека одлуката за продолжување на карантинот е по препорака на научните советници на кабинетот.
– Владата ќе оди во таа насока, додаде Сперанца.
Италија е најтешко погодена од епидемијата на коронавирусот – таму се регистрирани една третина од смртните случаи во светот.
Од почетокот на епидемијата, што почна во северните региони на 21 февруари, во Италија починаа 11.591 луѓе. И покрај воведениот карантин на национално ниво, бројот на заболени и починати не стивнува, што става дополнителен притисок врз здравствениот систем во државата што веќе е на работ на колапс.
