Фудбал

Кардиф упорно се жали, одбива да плати за трансферот на Сала

6. декември 2019 - 10:49 | А.С.

Кардиф е одлучен во намерата да не му плати на Нант за трансферот на фудбалерот Емилијано Сала кој почина пред да заигра за клубот.

Според договорот меѓу двата клуба, трансферот изнесуваше 17 милиони евра, но Кардиф одби да ги плати овие пари, затоа што во моментот на смртта на Сала сè уште не стана нивен играч.

Челниците на велшкиот клуб упатија официјална жалба до Суд за спортска арбитража (CAS) во која наведуваат дека не се должни да платат за трансферот.

„CAS ја прими жалбата на Кардиф во која се бара поништување на одлуката на ФИФА од 30 октомври, 2019 година. Согласно таа одлука, Кардиф мора да му ја плати на Нант првата рата од трансферот за Емилијано Сала во висина од 6 милиони евра. Жалбата е примена, а постапката е отворена. Засегнатите страи ќе бидат повикани да сведочат напролет во 2020 година, а одлуката ќе биде донесена налето“, стои во соопштението од CAS.

Аргентинецот Сала (28) загина на 21 јануари годинава, откако авионот со кој леташе од средбата со соиграчите во неговиот поранешен клуб Нант кон Кардиф, се сруши во Ла Манш.

Коментирај