Поранешниот напаѓач на репрезентацијата на Аргентина неодамна ја заврши играчката кариера, а веќе заплива во тренерските води.
Поранешниот голгетер Карлос Тевес, кој сега има 38 години, е именуван за нов предводник на аргентинскиот прволигаш Росарио Сентрал, од истоимениот град кој се наоѓа во северниот дел на земјата, 300 километри северозападно од престолнината Буенос Аирес.
Тевес кариерата официјално ја заврши на почетокот од месецов, но немаше одиграно натпревар откако ја напушти Бока Жуниорс минатата година. Пензијата ја најави уште лани кога рече дека физички се чувствува подготвен да игра до 42 години, но ментално не е подготвен за тоа поради смррта на неговиот татко во февруари лани.
Бидејќи во кариерата важеше за контроверзен играч, речиси никој не можеше да го замисли Тевес како тренер. Токму тоа се случи и тоа кратко по одлуката за пензионирање.
Тимот на Росарио Сентрал минатата сезона заврши на 16. место во аргентинската Примера. Игра на стадионот „Хиганте де Арожито“ кој е со капацитет од 41.654 гледачи. По 4 кола во новата сезона Росарио има 4 бода со скор од 1 победа, 1 реми и 2 пораза.
Тевес кариерата ја почна во младиснките погони на Ол Бојс, пред да се пресели во Бока Жуниорс. Играше и за Коринчјанс, Вест Хем, Манчестер Јунајтед, Манчестер Сити, Јувентус и Шанхај Шенхуа. За репрезентацијата на Аргентина одигра 76 натпревари на кои постигна 13 гола. Беше дел од Мундијалите 2006 и 2010, а трипати губеше во финале на Копа Америка (2004, 2007 и 2015).
