Плочата која потекнува од бронзеното време веројатно е најстарата тродимензионлана мапа на Стариот континент и потекнува од областа Бретања.
Се работи за плоча со димензии од 2x1,9 метри која прв пат била откриена во 1900 година, а потоа повторно откриена во 2014 година во подрум на еден дворец во Франција.
Археолозите кои ги проучуваа примероците издлабени на 4 илјади години старата камена мапа велат дека станува збор за карта на западниот дел од Бретања, област и полуостров во западниот дел на Франција. Тврдат и дека се работи за најстарата 3D мапа во Европа. Се верува дека плочата била направена во раното бронзено време, односно попрецизно помеѓу 1900 и 1650 година пред новата ера.
Прв пат плочата била пронајдена во 1900 година за време на ископувања на праисториски гробишта во Финистер, Западна Бретања, а ја пронашол локалниот археолог Пол ду Шателје.
Потоа, наводно плочата била заборавена во домот на Шателје во дворецот Шато де Кернис, сѐ до повторното нејзино откривање во 2014 година. По анализирањето востановено е дека се работи за мапа со прецизност од околу 80 отсто.
Во Бретања живеел келтски народ, а и денес локалното население се разликува од Французите и дури и говорат свој бретонски јазик кој припаѓа на келтската група на јазици.
