УЕФА од синоќа ги пушти во продажба картите за натпреварите на Македонија, но веднаш од стартот е вистински хаос нивна набавка за обичниот фудбалски навивач.
Имено, УЕФА на својата официјална веб-страница - дел за билети, објави дека принципот на продажба е „прв дојден, прв услужен“. Но, за да бидете услужени не треба да добиете амин од УЕФА, туку од ФФМ. Картите ќе може да се купуваат до 26 мај заклучно со 14 часот.
„Фудбалската федерација на Македонија ќе доделува кодови за пристап до порталот за билети на УЕФА за оние кои претходно ја контактирале федерацијата за набавка на билет. За повеќе информации и барање за код Ве молиме испратете и-меил на: biljana.velkovska@ffm.com.mk“, тоа е известувањето од УЕФА.
ФФМ воопшто не ни објави дека картите веќе можат да се купат, а од нивната прес-служба само информираа дека приоритет за набавка на билет имаат медицинските лица, одлука која ја најавија во ноември веднаш после пласманот.
Иако според УЕФА картите се пуштени во продажба од 17 мај од Федерацијата сѐ уште немаат објавено ништо на својата веб-страница, па единствените информациите се достапни на УЕФА на следниов линк.
Воедно, од ФФМ информираат дека за натпреварите во Букурешт ќе може да се оди со негативен ПЦР тест и без временско ограничување за престој. Претходно романските власти имаа донесено одлука сите кои доаѓаат со македонски пасош да можат да останат во земјата максимум 3 дена, што значеше дека не може да се поврзат двата натпревара. Сега тоа повеќе не важи.
За третиот натпревар во Амстердам сѐ уште нема информации дали македонските навивачи ќе можат да патуваат во Холандија и доколку можат кои услови ќе треба да ги исполнуваат.