По неколкудневни преговори со лидерот на СДСМ Зоран Заев, БЕСА одлучи дека нема да биде дел од новата влада. Заев не ги прифати принципите на БЕСА и не потпиша договор за заедничко владеење, и тоа е основниот мотив што не сме дел од владата, рече лидерот на партијата Билал Касами.
„Ние и понатаму остануваме важен фактор во заштита на интересите на Албанците. БЕСА останува во опозиција, но отворено ќе поддржи реформи кои се однесуваат на подобрувањето на статусот на Албанците и сите граѓани. БЕСА има свои принципи и не отстапува од нив, ние не сакаме да бидеме како Ахмети, кој тврдеше дека Груевски е виновен што не се остваруваат правата на Албанците“, рече Касами.
На новинарско прашање што подразбира под „редефинирање“, Касами рече дека тоа не е толку опасно како што се претставува, бидејќи се бара Албанците да бидат дел од одлуките кои ги носи државата.
„Не се работи за бинационална држава, туку треба да се прифати реалноста и таа да се рефлектира во регулирањето на државата и институциите. Ние и понатаму ќе се бориме за нашите права и ќе бидеме доследни до крај да падне овој режим“, додаде Касами.
Тој порача дека веќе го поддржале укинувањето на екстерното тестирање, потоа дека ќе дадат поддршка на СЈО, на одредени реформи од областа на владеењето на правото, како и други закони кои се однесуваат на подобрување на статусот на граѓаните на Македонија.