Антонио Касано, лошото момче на италијанскиот фудбал, во Реал Мадрид мина само година и пол. Но, останаа неразјаснети бројни анегдоти од неговата кратка кариера во шпанската престолнина.
Големиот талент на Касано остана во сенка на неговата недисциплина и инцидентите што ги предизвикуваше. Тој дојде во Реал во јануари 2006 година со репутација на еден од најталентираните, но и најнескротените млади фудбалери во светот. На крајот на краиштата, Рома, која пет години претходно го направи најскапиот тинејџер во историјата кога на Бари му плати 30 милиони евра, го чинеше Реал шестпати помалку.
Касано, по одличниот старт и гол само неколку минути откако влезе во игра во своето деби за Реал, покажа зошто е поим за недисциплина. Тешката ситуација со него стана неподнослива летото 2006 година. Тогаш Реал го презема Фабио Капело, со кого Касано исто така војуваше во Рома. Во ист стил продолжи и во Реал, каде играше полошо, поради што беше преселен на клупата. Седењето меѓу резервите на Реал не беше проблем дури ни за Роналдо и Дејвид Бекам, но беше за Касано, кој дивееше врз Капело пред сите, па затоа беше исфрлен од тимот.
Надвор од теренот, тој се истакнуваше со оргии со проститутки и прејадување со благо. Касано раскажа како постојано нарачувал продавачки на секс и огромни количини чоколадни кроасани во неговата хотелска соба. Во Мадрид го доби прекарот Дебелиот, а Реал го казнуваше за секој грам над дозволеното, но тоа не помогна. Сепак, во разговор со Фабио Канаваро и Кристијан Виери, за Bobo TV во сопственост на Виери, Касано го обвини Реал за неговото прејадување и дебелеење во Мадрид.
„Кратко по доаѓањето во Реал ослабев 12 килограми затоа што бев страшно мотивиран да се докажам во најголемиот клуб во светот, откако ме избркаа од Рома. Проблемот се појави затоа што еден од спонзорите на Реал во тоа време беше Nutella, која на секој играч му даваше 5 килограми од својот крем“, Касано објаснува како започнал неговиот пад во Реал и продолжува:
„Кога дојде Капело, постигнав два гола на првите два натпревара и се чувствував како господар на светот. Сепак, потоа ме замени во првото полувреме против Лион поради што се испокарав со него во Херес и ме избрка од тимот. Тогаш толку ѝ се нафрлив на Nutella-та, што за седум месеци качив 14 килограми, станав свиња. Секогаш јадев Nutella со лажица директно од тегла. Јадев толку многу што беше одвратно, но не ми беше гајле“.
Касано сега се кае за своето однесување кон Капело: „Многу ми е жал за сè што му направив затоа што тој е личност која многу ја ценам и многу ја сакам“.
Во неговата единствена сезона под водство на Капело во Реал, Касано ја освои титулата шампион на Шпанија, но, прејаден со Nutella, придонесе за тоа со само 7 настапи и еден гол, пред да биде вратен назад во Италија.