Поранешниот италијански фудбалер Антонио Касано уште еднаш го критикуваше Кристијано Роналдо, наведувајќи дека Португалецот не е ниту меѓу петте најдобри играчи во историјата.
На Twitch каналот на Кристијан Виери - „Bobo TV“, поранешниот ас на Рома, Реал Мадрид, Интер и Милан му одговори на Жорже Мендеш, кој верува дека го претставува најдобриот играч во историјата.
„Да, најдобар во историјата по Наполеон Бонапарта“, иронично рече Касано, додавајќи:
„Доста е со Жорже Мендеш! Роналдо не е ниту во првата петорка. Меси, Пеле, Марадона, Кројф и Роналдо Феномено се на друго ниво“, рече Италијанецот, а Виери се согласи со својот сонародник, иако додаде дека би го заменил Кројф со Ван Бастен.
Касано претходно го критикуваше Роналдо додека играше за Јувентус, нагласувајќи дека тимот мора да се жртвува за него, бидејќи тој размислува само за неговите голови и рекорди.
