Ракометниот суперлигаш Пролет има нов стратег на клупата и тоа искусниот Зоран Кастратовиќ кој доаѓа на местото на Никола Матлиевски.
Клубот од истоимената скопска населба синоќа спогодбено го раскина договорот со Матлиевски кој ја предводеше екипата од октомври 2017 година.
Замена експресно беше назначена и тоа во поранешниот предводник на Вардар и Металург, селектор на Црна Гора и Иран - Зоран Кастратовиќ. Црногорскиот стратег е сопруг на најдобрата македонска ракометарка на сите времиња, Индира Кастратовиќ.
„Мило ми е што повторно ќе работам во квалитетен тим од македонскиот шампионат. Запознаен сум со квалитетите на Пролет, верувам дека овој состав има потенцијал за да оствари добри резултати до крајот на сезонава. До крајот на сезонава имаме уште шест средби, а само со заедничка работа и максимална ангажираност можеме да стигнеме до она што сите го посакуваме - Тинекс Пролет да излезе во ракометна Европа. Благодарност до управата на клубот и верувам дека ќе ја оправдам нивната доберба и ќе им помогнам во остварувањето на зацртаната цел“, изјави Кастратовиќ за официјалната клупска веб-страница.
Пролет е на 3. место во плеј-оф групата за шампион зад Вардар и Еурофарм Пелистер и се бори за преостанатите две места (3 и 4) кои водат во еврокуповите.
Во Суперлигата следува мала пауза поради празниците, а сезоната продолжува на 9 мај кога Кастратовиќ ќе дебитира со натпреварот против Еурофарм Пелистер 2 на домашен терен во салата „Македонско Сонце“.