Каталонскиот медиум El Mundo Deportivo, кој е близок до Барселона, тврди дека постојат големи шанси за тоа српскиот репрезентативец Бранислав Ивановиќ во јануари да направи трансфер на Камп Ноу.
Иако Ивановиќ има 34 години и се наоѓа на залезот од својата богата кариера, се чини дека во Барселона тоа не им смета.
Тие добро знаат со какви квалитети располага Ивановиќ и би сакале да го ангажираат за барем привремено да ги пополни дупките во одбраната, додека Самуел Умтити и Томас Вермален се повредени, а Пике веројатно ја игра својата најлоша сезона во кариерата.
Барселона во план има уште неколку звучни имиња, меѓутоа како што тврдат каталонските медиуми управата на овој клуб е убедена дека Ивановиќ е вистинскиот избор за нив.
На лето му истекува актуелниот договор со Зенит, па и нема да биде скап, искусен е и играше на највисоко можно ниво, а и денеска искусниот Србин игра доста добро.
Каталонците уште пред две сезони го сакаа Ивановиќ додека тој беше член на Челзи, каде што и ги одигра најдобрите години од кариерата, но Србинот ја одби тогаш понудата и одлучи да се врати во Русија.
Ивановиќ во текот на кариерата настапуваше за Срем, ОФК Белград, Локомотив Москва, Челзи и Зенит.
Златните години ги помина во Лондон, а во девет години играње на Стемфорд Бриџ тој три пати ја освои Премиер лигата, три пати ФА купот и еднаш Лигата на шампионите.
За репрезентацијата на Србија одигра 105 натпревари и постигна 13 голови.