На синоќешниот конгрес на Меѓународната кошаркарска федерација (ФИБА) што се одржа во Манила (Филипини) беше избран новиот претседател на чадор-куќата на светската кошарка.
Нов претседател на ФИБА ќе биде катарскиот шеик Сауд Али Ал Тани, кој ќе го наследи Хамане Нианг на таа позиција. Ал Тани беше едногласно избран за нов претседател.
Станува збор за поранешниот потпретседател на ФИБА и прв човек на азискиот оддел на ФИБА од 2002 година. Тој е прв човек на Олимпискиот комитет на Катар и долго време беше претседател на Катарската кошаркарска асоцијација.
„За мене е голема чест да ја преземам оваа одговорност: за мене, за мојата земја Катар и за нашиот континент Азија. Сега ги застапувам интересите на сите 212 национални федерации во сите пет региони. Кошарката е глобален спорт и таа е нашата најважна сила. Денеска можам да ветам само едно, а тоа е дека ќе работам напорно со челниците на ФИБА и целиот Централен комитет за доброто на кошарката и за доброто на ФИБА“, изјави Ал Тани по назначувањето.
Избрани се и нови членови на Централниот комитет на ФИБА, кои за прв пат ќе се сретнат на 9 септември во Манила на денот на финалето на МундоБаскетот.
