Понекогаш се случува да заборавите некоја работа која ви е важна, за потоа да се каете зошто немате подобра меморија. Но, можеби клучот за полесно паметење на работите е да ги кажете истите на глас.
Овој начин на паметење на работите се нарекува „ефект на продуктивност“.
Професорот Стивен МекЛеод од Универзитетот од Ватерлу, тврди дека изговарањето на глас на работите кои ни се битни води до подобро запамтување на истите. Тоа тој и го докажа преку истражување, кое се состоеше од четири различни групи и начини на паметење на работите: група која чита зборови во себе, група која ги чита зборовите на глас, група која слуша како друг ги чита зборовите и група која слуша снимка од својот глас како ги чита зборовите.
Резултатите од истражувањето покажаа дека групата која ги читала зборовите на глас запамтила најголем дел од нив, а на второ место се најде групата која слушаше снимка од својот глас како ги чита зборовите. Најлоши резултати покажа групата која беше натерана да ги чита зборовите во себе.
МекЛеод вели дека истите резултати се валидни и за секојдневни работи, не само за памтење зборови. Според него, доколку ги изговарате на глас работите кои ви се случуваат во секојдневниот живот, како на пример „ја исклучив рерната“, може да ви помогне да запамтите дека сте ја извршиле таа обврска.