Од Град Скопје најавија акција во која ќе ги ослободат пешачките зони и велосипедските патеки од рекламните билборди.
Конечно скопјани ќе куртулат од дел од сметалата среде тротоарите и велосипедските патеки. Од Град Скопје денеска го објавија наредниот проект кој ќе се реализира во периодот кој следува и кој предвидува отстранување на вкупно 240 рекламни објекти од јавниот простор.
Во Скопје има вкупно 680 билборди, но не сите се на површини на кои го оневозможуваат слободното движење на граѓаните. При оваа акција, ќе бидат отстранети 120 билборди и исто толку ситилајти кои се означени дека им сметаат на граѓаните да го остварат своето уставно право за слободно и непречено движење по јавните површини.
„Продолжуваме со интензивното ослободување на јавните простори во Скопје со цел да обезбедиме повеќе простор за пешаците и за велосипедистите во време на светската пандемија на коронавирусот. На задоволство на граѓаните постигнавме договор со компаниите кои се занимаваат со закуп на рекламен простор во делот на билборди и ситилајти, доброволно да отстранат вкупно 240 рекламни објекти од јавните површини во Скопје и покрај тоа што во минатото имаат склучено договор со градот, за што платиле извесен надомест. Станува збор за 120 билборди и 120 ситилајти кои биле легално поставени во најголем дел на тротоари, пешачки површини, велосипедски патеки и други јавни површини и на тој начин го ограничувале движењето на пешаците и на велосипедистите со што ја намалувале и безбедноста на целокупниот сообраќај“, рече градоначалникот Петре Шилегов на денешната прес-конференција.
„Сакам да се заблагодарам на компаниите кои ги издаваат овие рекламни објекти за разбирањето и покажаната одговорност кон граѓаните, а кои се откажуваат од дел од својата заработка со цел граѓаните да имаат повеќе и побезбеден јавен простор во градот, рече градоначалникот Петре Шилегов, на денешната прес-конференција“, додате тој.