Во продукција на Showtime наскоро на екраните повторно ќе оживее приказната за Ал Капоне и Елиот Нес.
Сценариото е на Бен Џејкоби, а серијата „Scarface and the Untouchable“ е базирана според книгата на Макс Ален Колинс и Бред Шварц и говори за животите на познатиот гангстер и неговиот непријател Елиот Нес во Чикаго, за време на прохибицијата.
Приказната за Капоне и Нес досега е прикажана низ различни форми на медиуми, но изгледа дека до денес привлекува внимание.
Официјалниот синопсис на серијата гласи: „Во 1929 година, 30-годишниот гангстер Ал Капоне подеднакво владее со подземјето во Чикаго, но и со корумпираната влада. Скарфејс стана локален херој и славна личност. Но, по бруталниот масакр на Денот на вљубените, Капоне е народен непријател број 1. Федералната влада пронајде несуден херој во 27-годишниот агент по име Елиот Нес. Избран да го предводи легендарниот тим познат како „The Untouchables“, Нес се фокусира да го уништи криминалното царство на Капоне“.
Серијата ветува дека ќе се фокусира на периодот на забрани, индустријализација, имигрантско искуство, спроведување на законот и раѓање на организиран криминал.
Ќе го следи периодот од 20-тите години на минатиот век до Големата депресија, сиромашните квартови па до Белата куќа. Ќе покаже каков криминалец бил Капоне, додека Нес важи за еден од најреволуционерните полицајци во американската историја.
